DGKA-da V “TUSİ” inkubasiya proqramı ilə bağlı infosessiya keçirilib
Dövlət Gömrük Komitəsinin Akademiyasında (DGKA) “ASAN xidmət”in “Gələcək üçün bacarıqlar” layihəsinin V “TUSİ” İnkubasiya proqramı ilə bağlı infosessiya keçirilib. İnfosessiya Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” Layihələrin idarə edilməsi departamentinin müdir müavini Ziniddin Babayev və departamentin layihə meneceri Nərmin Kərimova tərəfindən keçirilib.
Tədbirdə tələbələrə layihə çərçivəsində həyata keçirilən proqramlar, inkubasiya mərhələsinin üstünlükləri və iştirak imkanları barədə ətraflı məlumat verilib. Bildirilib ki, proqram innovasiya sahəsində kadr potensialının gücləndirilməsinə, gənclərin yaradıcı və texnoloji təşəbbüslərinin dəstəklənməsinə xidmət edir. Eyni zamanda proqram çərçivəsində təlimlər, yerli və xarici ekspertlərlə görüşlər, mentor dəstəyi və şəbəkələşmə imkanları təqdim olunacağı qeyd olunub, həmçinin ideyanın formalaşdırılması, komanda quruculuğu və startapın real biznes modelinə çevrilməsi yolları izah edilib.
Qeyd olunub ki, V “TUSİ” İnkubasiya proqramına qoşulmaq istəyənlər https://gub.icenter.az/home linki vasitəsilə qeydiyyatdan keçərək müvafiq müraciət formasını doldurmalıdırlar.
Sonda tələbələri maraqlandıran suallar cavablandırılıb.
04.03.2026
