DGKA birincisi həm də Türkiyədə Hüquq fakültəsini birinciliklə bitirdi
Dövlət Gömrük Komitəsinin Akademiyasının (DGKA) birincisi, “Hüquqşünaslıq” ixtisasının 2024-cü il məzunu Ramazan Əsgərxanov Türkiyədə mühüm akademik uğura imza atıb. Ramazan Əsgərxanov “Türkiye Bursları” proqramı çərçivəsində təhsil aldığı Ankara Universitetinin Hüquq fakültəsini də 4.0 maksimal GPA göstəricisi ilə fakültə birincisi kimi bitirib.
Bu nəticə məzunumuzun akademik yolunda əldə etdiyi ilk yüksək göstərici deyil. Belə ki, təhsil aldığı illər ərzində nəinki akademik göstəriciləri, həm də fəal ictimai mövqeyi ilə seçilən Ramazan Əsgərxanov Akademiyanın yeganə “Heydər Əliyev” təqaüdçüsü olmuş, DGKA-nı fərqlənmə diplomu və birinciliklə bitirmişdir. O, təkcə dərslərində deyil, eləcə də Akademiyanın sosial-mədəni həyatında, intellektual yarışlarda və keçirilən müxtəlif respublika və beynəlxalq səviyyəli tədbirlərdə həmişə xüsusi fəallıq nümayiş etdirərək yüksək nailiyyətlər qazanmışdır.
Elmi fəaliyyətlə də ardıcıl məşğul olan şəhid əmanəti məzunumuz hazırda 12 elmi məqalə və 15 konfrans materialının müəllifidir. Uğurlarının davamı olaraq, Ramazan Əsgərxanov 2026/2027-ci tədris ilində yenidən “Türkiye Bursları” təqaüd proqramı çərçivəsində İstanbul Universiteti Hüquq fakültəsinin Xüsusi Hüquq Proqramında doktorantura təhsilini davam etdirəcəkdir.
DGKA-da təhsil aldığı müddətdə qazandığı bilikləri elmi fəaliyyət və ictimai fəallıqla tamamlayan, məzun olduqdan sonra isə beynəlxalq təhsil imkanlarından yararlanaraq akademik yolunu uğurla davam etdirən məzunumuz bu gün artıq yeni nəslin gənc hüquqşünasları arasında özünəməxsus mövqeyini formalaşdırır.
Dövlət Gömrük Komitəsinin Akademiyası adından məzunumuz Ramazan Əsgərxanovu bu növbəti böyük nailiyyəti münasibətilə təbrik edir, gələcək elmi-peşəkar fəaliyyətində yeni-yeni uğurlar arzulayırıq!
10.09.2026
